Qarshida piyodalar yo‘lakchasidan o‘tayotgan yosh qizni urib qochib ketgan Cobalt va uning haydovchisi topildi

Hodisa oqibatida og‘ir tan jarohatlari olgan qiz shifoxonaning jonlantirish bo‘limiga yotqizilgan. Hozirda uning ahvoli og‘irligi aytilmoqda.

Foto: IIV YHXBB axborot xizmati

Avvalroq Kun.uz’da Cobalt mashinasi Qarshi shahridagi piyodalar yo‘lakchasida yosh qizni urib yuborib, jabrlanuvchiga yordam bermasdan qochib ketgani haqida xabar berilgandi. IIV YHXB axborot xizmatining xabar berishicha, Cobalt topilib, uning haydovchisi ushlangan.

Ma’lum qilinishicha, 2022 yil 5 dekabr kuni soat 20:00 larda Qarshi shahridagi Nasaf ko‘chasida Cobalt mashinasi haydovchisi piyodalar yo‘lakchasidan ko‘chani kesib o‘tayotgan 13 yoshli qizni urib yuborgan.

Haydovchi hayoti va sog‘ligi xavf ostida qolgan jabrlanuvchiga yordam bermasdan, voqea joyidan qochib, yashiringan.

Olib borilgan tezkor surishtiruvlar natijasida Cobalt mashinasi hamda uning haydovchisi topilgan.

Qayd etilishicha, holat yuzasidan haydovchiga nisbatan Jinoyat kodeksining 266-moddasi 1-qismi va 117-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Qarshida piyodalar yo‘lakchasidan o‘tayotgan qizchani urib yuborgan Cobalt hodisa joyidan qochib ketdi