Andijon yo‘lsozlari o‘ylab topgan “innovatsiya” sabab asakalik aholi qiynalmoqda

Bu yo‘ldan kuniga minglab odamlar bozorlik qilish uchun yayov yoki ulovlarida o‘tadi. Lekin ikki tomondan kelayotgan avtomobillardan biri asfaltdan pastga tushib olishiga to‘g‘ri keladi. Bu esa yo‘lchilarning o‘ziga xos “innovatsiyasi” bo‘lsa kerak.

Yo‘lning bu 50 metrlik qismi juda ensiz qilib asfalt qilingan. Lekin yo‘lning bu uchastkasidan har ikkala tomonga qarab yursangiz, chala joydan o‘tib bo‘lgach, to‘liq chetlarigacha asfalt qilingan yo‘lga duch kelasiz. Bu aholi murojaatlariga “mana senga” degan qabilida ish qilinganga o‘xshaydi.

Bundan tashqari, yo‘lning ana shu chala qismida ikkita katta chuqur ham bor. Chuqur bozorlik uchun kelganlarga noqulaylik tug‘diradi.

“Mashina bilan bozor oldiga borgani yuragimiz betlamaydi. Juda sekin harakat va uzun tirbandlik. Shu yo‘lni to‘g‘rilab, haydovchilarga qulaylik yaratishsa, yaxshi bo‘lardi. Bu yerdan kuniga mingdan ortiq avtomobil harakat qilsa kerak”, – deydi yo‘lovchilardan biri.

Haqiqatda ham tasvirga olish jarayonida aholining noqulayliklarga uchrayotganiga guvoh bo‘ldik. O‘ylaymizki, mutasaddilar bu “innovatsiya”ning qolib ketgan qismini to‘g‘rilab qo‘yishadi. Tegishli organlar chala asfalt qilingan joyga sarflangan mablag‘lar bilan qiziqib ko‘rsa ham yaxshi bo‘lar edi.

Abduvali Qurbonov,
Kun.uz muxbiri.
Tasvirchi – Jahongir Turg‘unov.