Britaniyada dunyodagi eng nomdor tennischi qamoqdan ozod etildi

Dunyodagi eng taniqli tennischilardan biri, «Katta dubulg‘a» turnirlarining 6 karra g‘olibi, teleboshlovchi, germaniyalik Boris Bekker Buyuk Britaniyada qamoqdan ozod etildi. U qarzlarni to‘lashdan bo‘yin tovlagani uchun 8 oylik jazoni o‘tadi va «namunali xulqi» evaziga ozodlikka chiqarildi.

Bekker shu yilning aprel oyida London sudi tomonidan qamoq jazosiga mahkum qilingandi. Hakamlar hay’ati tennischini kreditorlarni aldaganlikda aybdor deb topib, 20 yil avval Germaniya sudi tomonidan xuddi shunday qaror qabul qilinganini eslatib, uni 2,5 yilga ozodlikdan mahrum qildi. O‘sha paytda Bekker soliqlardan bo‘yin tovlagani uchun 2 yillik shartli qamoq jazosiga hukm qilingandi.

15 yillik faoliyati davomida 6 marta «Katta dubulg‘a» turnirida g‘olib chiqqan dunyodagi eng nomdor tennischi hech qachon pulga muhtoj bo‘lmagan. Ammo ochko‘zlik qurboniga aylandi.

Bekker 1999 yilda professional faoliyatini yakunlab, Buyuk Britaniyaga ko‘chib o‘tib, sport ko‘rsatuvi boshlovchisi bo‘lib ishlayotgan edi. Biroq, 2017 yilda Bekker kreditorlarga jami 50 million funt sterlingni to‘lay olmasligini aytib, bankrotlik to‘g‘risida ariza berdi. 

Keyinchalik tergovda sportchining o‘ziga tegishli bo‘lgan aktivlar va ko‘chmas mulklari haqidagi ma’lumotlarni yashirgani, shuningdek, bankrotlik to‘g‘risidagi ish qo‘zg‘atilgan paytda sobiq xotiniga katta miqdorda pul o‘tkazib bergani aniqlandi. 

Britaniya matbuotiga ko‘ra, endi Bekker yaqin orada Germaniyaga deportatsiya qilinadi.