Samarqand sentabr oyida xalqaro turnirga mezbonlik qiladi 

Ushbu nufuzli musobaqa Samarqand turizm markazi – «Silk Road Samarkand»da «Challenge family» tasnifida o‘tkazilishi rejalashtirilgan. 

Bugun, 17 yanvar kuni O‘zbekiston milliy matbuot markazida OAV xodimlari ishtirokida ushbu turnirga bag‘ishlangan matbuot anjumani o‘tkazildi. Kun.uz muxbiri matbuot anjumanidan fotolavha tayyorladi.
 

Ko‘hna shahardagi musobaqada xorijlik sportchilar bilan birga sportga qiziquvchi havaskorlar ham ishtirok etishi mumkin bo‘ladi. Musobaqaning sovrin jamg‘armasi 25 ming AQSh dollarini tashkil etishi kutilmoqda.

Ishtirokchilar uchun 3 bosqichli sportda yosh toifasiga qarab masofa belgilab beriladi. Unga ko‘ra, o‘rta masofada dastlab 1,9 kilometr suzish, 86 km velopoyga va 21,5 kmga yugurish bosqichlaridan o‘tishlari kerak bo‘ladi. Ayollar va yoshlar uchun masofalar qisqaroq bo‘ladi.

Tomoshabinlar uchun musobaqani ko‘tarinki ruhda kuzatishlari va yaqinlarini qo‘llab-quvvatlashlari uchun imkoniyat yaratilishi ta’kidlandi.

Samarqand shahridagi ushbu xalqaro turnir mamlakatimizda sportni, ayniqsa triatlon va sport turizmini rivojlantirishda muhim o‘rin tutadi.