Yangilanayotgan Konstitutsiyada soliq va yig‘imlar adolatli bo‘lishi belgilanadi

Konstitutsiyaviy qonun loyihasida barcha sohalarda fuqarolarning konstitutsiyaviy huquqlari ta’minlanishiga erishish masalasi ustuvor qo‘yilgan. Unda soliq va yig‘imlar adolatli bo‘lishi va fuqarolarning konstitutsiyaviy huquqlarini amalga oshirishiga to‘sqinlik qilmasligi o‘rnatilmoqda. Norma barcha fuqarolar, tadbirkorlar huquq va manfaatlarini ta’minlashga xizmat qiladi.

Deputatlar qayd etganidek, avvalgi muhokamalarda Konstitutsiyaviy qonun loyihasidan hokimlarning xalq deputatlari Kengashlariga boshchilik qilishini nazarda tutuvchi qoida chiqarib tashlangan edi. Biroq, jamoatchilik tomonidan berilgan takliflarda bunday o‘zgarishning o‘zi yetarli emasligi, ya’ni hokimlar xalq deputatlari Kengashlarida rahbar bo‘la olmasligi aniq ko‘rsatilishi kerakligi bildirilgan. Shunga muvofiq, «hokim lavozimini egallab turgan shaxs bir vaqtning o‘zida tegishli xalq deputatlari Kengashining raisi lavozimini egallashi mumkin emas» degan qat’iy norma o‘rnatilmoqda.

Qayd etilganidek, yetarlicha asoslantirilmagan, nizo keltirib chiqaruvchi yoki Konstitutsiyada aks ettirishga ehtiyoj yo‘q deb hisoblanuvchi qoidalar chiqarib tashlanmoqda. Muhokamaga chiqarilgan loyihada «mehnatga haq to‘lashning eng kam miqdori insonning nafaqat o‘zi, balki oilasi yashashi uchun ham yetarli bo‘lishi kerak» degan norma ko‘p e’tirozlarga sabab bo‘ldi.

Jamoatchilik hamda ekspertlarning fikricha, aynan bir xil lavozimdagi xodimlarga oilasining katta yoki kichikligi, ya’ni oila a’zolari soniga qarab turlicha ish haqi to‘lanishi tenglik mezoniga to‘g‘ri kelmaydi va mehnat sohasida kamsitishga olib keladi. Ushbu qoida «mehnatga haq to‘lashning eng kam miqdori insonning munosib turmush darajasini ta’minlash zarurati hisobga olingan holda belgilanadi» degan qoidaga almashtirildi.