Butunjahon matbuot erkinligi kunida Antoniu Guterrish ommaviy axborot vositalari erkinligi demokratiya va adolat asosi sifatida muhimligini eslatdi. Uning ta’kidlashicha, 2022 yilda kamida 67 jurnalist o‘ldirilgan.
BMT bosh kotibi Antoniu Guterrish demokratiya va adolatning asosiy tamoyili sifatida ommaviy axborot vositalari erkinligi muhimligini eslatdi. Erkin jurnalistika “barchamizga o‘z fikrimizni shakllantirishimiz va hokimiyatga haqiqatni aytishimiz kerak bo‘lgan faktlarni beradi”, dedi u 3 may, chorshanba, Jahon matbuot erkinligi kunida.
Matbuot erkinligi hozir butun dunyo bo‘ylab hujum ostida, dedi Guterrish, dezinformatsiya va nafrat ritorikasi esa haqiqat va fantastika, ilmiy dalillar va fitna nazariyalari o‘rtasidagi chegaralarni xiralashtiradi. “Media industriyasining bir necha kishi qo‘lida jamlanishi, o‘nlab mustaqil axborot tashkilotlarining moliyaviy tanazzulga uchrashi va jurnalistik faoliyatni bo‘g‘uvchi milliy qonun va qoidalarning ko‘payishi senzurani yanada kuchaytiradi va so‘z erkinligiga tahdid soladi”, - dedi BMT rahbari.
Uning so‘zlariga ko‘ra, 2022 yilda kamida 67 nafar ommaviy axborot vositalari xodimi halok bo‘lgan – bu bir yil avvalgiga nisbatan 50 foizga ko‘pdir. Jurnalistlar o‘z kasbiy burchlarini bajarishga urinib, maqsadli hujumlar qurboni bo‘lishdi, dedi Guterrish. Bundan tashqari, ayol jurnalistlarning deyarli to‘rtdan uch qismi onlayn zo‘ravonlikka duchor bo‘lgan va har to‘rtdan biri jismoniy tahdidlarga duch kelgan. "Do‘q-po‘pisa va hujumlarni to‘xtating. Jurnalistlarni o‘z ishini qilgani uchun hibsga olishni va qamoqqa olishni, yolg‘on va dezinformatsiyani bas qiling", - deya bayonot berdi BMT bosh kotibi.
1993 yil dekabr oyida YuNeSKO taklifi bilan BMT Bosh Assambleyasi tomonidan 3 may Butunjahon matbuot erkinligi kuni deb e’lon qilingan. Shu tariqa, bu yil u 30-marotaba nishonlanmoqda.
