Air Cairo aviakompaniyasining Sharm-al-Shayx - Toshkent yo‘nalishi bo‘yicha SM771 reysi Sharm-al-Shayxdagi noqulay ob-havo sharoiti, shuningdek, ekipaj ish vaqti tugagani sababli Misr aeroportida 10 soatdan ortiq kechiktirildi.
200 dan ortiq yo‘lovchi O‘zbekiston poytaxtiga jo‘nab ketishni kutmoqda. Sharm-al-Shayxdan Toshkentga uchadigan samolyot Toshkent vaqti bilan soat 15:00 da uchishi rejalashtirilgan. Toshkentga yetib kelish soat 19:30 ga belgilangan.
Uzoq kechikish munosabati bilan SM771 (Toshkent — Sharm-al-Shayx) reysining parvozlar jadvali o‘zgartirildi. Toshkentdan jo‘nab ketish 2023 yil 17 may soat 20:30, Sharm-al-Shayxga yetib kelish 2023 yil 18 may, Toshkent vaqti bilan soat 01:55 ga belgilangan.
“Toshkent” xalqaro aeroportidan uchayotgan yo‘lovchilarga reysning kechiktirilgani haqida xabar berilgan va ularga o‘z uylariga qaytish yoki terminalda parvozni kutish taklif qilingan.
Parvoz jadvalini o‘zgartirish to‘g‘risidagi batafsil ma’lumotlar aviatashuvchidan olinishi mumkin.
