Qoraqalpog‘iston tibbiyot instituti klinikasida gospital turdagi «Mehrli maktab» filiali ochildi.
«Mehrli maktab»ga tashrif chog‘ida Ziroat Mirziyoyeva bu yerda yaratilgan sharoitlar bilan tanishdi, bolalar bilan samimiy suhbatlashib, pedagoglar va ota-onalarga dalda so‘zlarini izhor etdi.
«Mehrli maktab» – ta’limdan, kim qanday vaziyatga tushib qolganidan qat’i nazar, barcha bahramand bo‘lishi mumkinligiga yorqin misol. Bu yerda uzoq vaqt davomida davolanayotgan hamda oddiy maktab yoki bog‘chaga qatnash imkoniyati bo‘lmagan bolalar bilim olmoqda va tarbiyalanmoqda. Ular reabilitatsiya jarayonidan ham shu yerning o‘zida ota-onalari ishtirokida o‘tadilar.
Yil yakuniga qadar «Mehrli maktab» filiallari Andijon va Farg‘onada ochiladi.
PS: Mirziyoyeva Ziroát Maxmúdovna (1964 yil 4 dekabr kuni tug‘ilgan, Qo‘qon shahri, Farg‘ona viloyati, O‘zbekiston SSR) – jamoat arbobi, muhandis-iqtisodchi, O‘zbekiston Respublikasi Prezidenti Shavkat Miromonovich Mirziyoyevning rafiqasi.
Ziroat Mirziyoyeva 1964 yil 4 dekabr kuni Farg‘ona viloyati Qo‘qon shahrida tug‘ilgan. 1986 yilda Toshkent irrigatsiya va melioratsiya institutini (hozirda “Toshkent irrigatsiya va qishloq xo‘jaligini mexanizatsiyalash muhandislari instituti” Milliy tadqiqot universiteti) muhandis-iqtisodchi ixtisosligi bo‘yicha tamomlagan. O‘zbek, rus va ingliz tillarini biladi. Ikki nafar qizi va bir nafar o‘g‘li bor. Mumtoz va milliy musiqani xush ko‘radi, tarix bilan qiziqadi.
2020 yildan buyon O‘zbekistonda ochiq va inklyuziv muhitni yaratish orqali aholining yordamga muhtoj qatlamlarini ijtimoiy himoya qilish, sog‘liqni saqlash va ta’limni rivojlantirish masalalari bo‘yicha qator xayriya loyihalarini amalga oshirayotgan “Zamin” xalqaro jamoat fondi Vasiylik kengashi raisidir.
Fond faoliyatining ustuvor yo‘nalishi atrof-muhitni muhofaza qilishdan iborat. Ko‘kalamzorlashtirish, havo sifati monitoringini avtomatlashtirish, tabiiy resurslardan oqilona foydalanish, yoshlar orasida ekologik ta’limni rivojlantirish, olis hududlarda toza ichimlik suvi bilan ta’minlash kabi masalalar bo‘yicha loyihalar amalga oshirilmoqda.
Ijtimoiy va ekologik sohalardagi dolzarb masalalarga ko‘proq e’tibor qaratish maqsadida ham milliy, ham xalqaro darajada qator tadbirlarni o‘tkazmoqda.
