Twitter dezinformatsiyaga qarshi ixtiyoriy kodeksdan voz kechdi

Nemis siyosatchilari Twitter’ning Yevropa Ittifoqining dezinformatsiyaga qarshi ixtiyoriy xatti-harakatlar kodeksidan chiqish rejalarini tanqid qildi. 28 may, yakshanba kuni Handelsblatt nashriga bergan intervyusida Germaniya Sotsial-demokratik partiyasi hamraisi Zaskia Esken shunday dedi: "Twitter o‘z tarmog‘ida tobora kuchayib borayotgan dezinformatsiyaga qarshi turishni istamasligi aniq".

Esken Ilon Mask kompaniyasiga avgust oyida Yevropa Ittifoqida kuchga kiradigan yangi raqamli xizmatlar to‘g‘risidagi qonunda (Digital Services Act, DSA) ko‘rsatilgan choralar bilan tahdid qildi. Germaniyaning raqamli infratuzilma va transport vaziri Folker Vissing ham xuddi shunday tarzda gapirdi. Funke Mediengruppe nashriga bergan intervyusida u dezinformatsiyaga qarshi kodeksni “soxta yangiliklarni tan olish va yo‘q qilishning samarali vositasi” deb atadi. Agar Twitter buni mas’uliyat bilan hal qilmasa, "biz DSA ijrosi haqida gapirishimiz kerak", dedi u.

Avvalroq, ichki bozor bo‘yicha Yevropa komissari Terri Breton Twitter dezinformatsiyaga qarshi kurash bo‘yicha o‘zini tutish qoidalaridan chiqishga qaror qilganini bildirgandi. Ushbu kodeks kompaniyalardan noto‘g‘ri ma’lumotlar tarqalishiga qarshi choralar ko‘rishni va ularning muvaffaqiyati haqida muntazam ravishda hisobot berishni talab qiladi. Twitter’dan tashqari kodeks Google, Tiktok, Microsoft va Meta kompaniyalari tomonidan imzolangan.

Raqamli xizmatlar to‘g‘risidagi qonun noqonuniy kontentni o‘chirish jarayonini tezlashtirish va foydalanuvchilarga bunday xabarlarni belgilashni osonlashtirish uchun mo‘ljallangan. Doimiy ravishda qoidabuzarliklar uchun internet kompaniyalari yillik global aylanmasining olti foizigacha jarimaga tortilishi mumkin.