Iqtisodchi: Germaniyaga yiliga 1,5 million muhojir kerak

Germaniya hukumati qoshidagi iqtisodiy ekspertlar kengashi raisi Monika Shnitserning aytishicha, Germaniyaga malakali kadrlar taqchilligi bilan kurashish uchun yiliga 1,5 million muhojir kerak. Germaniyadan emigratsiyaning yuqori sur’atlari hisobga olinsa, gap yiliga 400 000 yangi mamlakat aholisi haqida ketyapti. 3 iyul, dushanba kuni Süddeutsche Zeitung gazetasiga bergan intervyusida ekspert rasmiylarni boshqa davlatlardan mutaxassislar oqimini qabul qilishga chaqirdi.

Shnitserning fikricha, Germaniya zudlik bilan muhojirlarni qabul qilish sharoitlarini yaxshilashi kerak. «Agar Intel  Magdeburgda zavod qursa va buning uchun xorijlik mutaxassislarni jalb qilmoqchi bo‘lsa, ular u yerda ularni yaxshi kutib olish kerak», deb ta’kidladi ekspert. 

Germaniya hukumati malakali kadrlar to‘g‘risidagi yangi qonunni ishlab chiqayotib, to‘g‘ri yo‘ldan bormoqda, ammo bu yetarli emas, deb hisoblaydi kengash rahbari. Xususan, Germaniyaga yaqinda kelgan har bir xorijlikdan nemis tilini bilishni talab qilmaslik kerak, aksincha chet elliklar uchun bo‘limlarning barcha xodimlarining ingliz tilini bilishi haqida qayg‘urish kerak, deydi u. 

Germaniya hukumati koalitsiyasi Yevropa Ittifoqiga a’zo bo‘lmagan davlatlarning malakali ishchilarini ishga joylashtirishga ko‘maklashishga qaror qildi va nemis tilini biladigan yoki o‘ta kam uchraydigan kasblardan birida ishlayotgan xorijliklarga hatto ish joyi yoki o‘qish sertifikatisiz ham Germaniyaga kirishiga ruxsat beruvchi qonun loyihasini ishlab chiqdi. Kasbiy malakaga ega bo‘lgan xorijliklar nafaqat o‘qigan mutaxassisligi bo‘yicha, balki boshqa sohalarda ham ishlash imkoniyatiga ega bo‘ladi.