Ispaniya 500 minggacha noqonuniy muhojirni legallashtiradi

Ispaniya hukumati seshanba, 27 yanvar kuni mamlakatda ruxsatnomasiz yashab va ishlab kelayotgan muhojirlarga legal maqom beruvchi dastur boshlanishini e’lon qildi. Integratsiya, ijtimoiy sug‘urta va migratsiya vaziri Elma Saisning so‘zlariga ko‘ra, bu chora 500 minggacha insonga ta’sir qilishi mumkin. Associated Press agentligining yozishicha, dastur migratsiya qonunchiligiga o‘zgartish kiritishni tezlashtirilgan tartibda qabul qilish orqali amalga oshiriladi va parlamentda turib qolgan shunga o‘xshash qonun loyihasini chetlab o‘tadi.

2025 yil 31 dekabrgacha Ispaniyada xalqaro himoya so‘rab ariza topshirgan va shu sanaga qadar mamlakatda kamida 5 oy yashaganini isbotlay olgan xorijliklar 1 yillik yashash uchun ruxsatnoma va ishlashga ruxsat olishi mumkin. Ular, shuningdek, sudlanmaganini ham tasdiqlashi kerak.

AP qayd etishicha, Ispaniya 1986–2005 yillar oralig‘ida muhojirlarni legallashtirish choralariga olti marta murojaat qilgan. Hozirgi qaror Yevropada migratsiya siyosati qattiqlashtirilayotgan umumiy tendensiyaga zid keladi. Elma Saisning aytishicha, Ispaniya global antimigratsiya siyosati to‘lqiniga qarshi kurashda “mayoq” bo‘lib qoladi.

Turli baholarga ko‘ra, Ispaniyada noqonuniy tarzda 800 minggacha odam yashaydi. Ularning ko‘pchiligi — Lotin Amerikasi yoki Afrika davlatlaridan kelgan muhojirlar bo‘lib, qishloq xo‘jaligi, turizm yoki xizmat ko‘rsatish sohalarida ishlaydi, deb yozadi AP.

Ispaniyaning markazchi va o‘ng qanot partiyalari hukumat tashabbusini allaqachon tanqid qildi. Konservativ Xalq partiyasi yetakchisi Alberto Nunes Feyxoo Ispaniya bosh vaziri Pedro Sanchesni yaqindagi temiryo‘l fojiasidan (unda 40 nafardan ortiq odam halok bo‘lgan) e’tiborni burishga urinishda aybladi. Shu bilan birga, o‘ta o‘ng Vox partiyasi rahbari Santyago Abaskal ijtimoiy tarmoqlarda Sanches ispanlarni “yomon ko‘radi” va muhojirlarning mamlakatga “bostirib kirishini tezlashtirmoqda”, deb yozdi.