Hindiston «Chandrayan-3» kosmik stansiyasini Oy orbitasiga olib chiqdi

«Chandrayan-3» avtomatik koinot stansiyasi Oy atrofidagi orbitaga muvaffaqiyatli olib chiqildi. Bu haqda Hindiston kosmik agentligi xabar berdi.

«Chandrayan-3» Oy orbitasiga muvaffaqiyatli olib chiqildi. Navbatdagi operatsiya (orbitani pasaytirish) 6 avgust kuniga rejalashtirilgan», deyiladi tashkilot xabarida.

«Chandrayan-3» apparati qo‘nish va harakatlantiruvchi modullar hamda Oyyurardan iborat. Qo‘nish qismi 17 avgust kuni apparatdan ajralib chiqadi va hind mutaxassislarining hisob-kitoblariga ko‘ra, 23 avgust kuni Oy yuzasiga qo‘nadi.

2019 yilda «Chandrayan-2» kosmik kemasi Oy orbitasiga olib chiqilgan edi. Ammo «Vikram» modulini Oy yuzasiga qo‘ndirish paytida noma’lum sabablarga ko‘ra aloqa uzilib qoldi. Hindistonlik mutaxassislar qurilma bilan aloqani tiklash uchun bir qancha urinish qildi, biroq ularning barchasi behuda ketdi.

«Chandrayan-3» missiyasi ushbu xatolarni inobatga olgan holda tashkil etildi. Bu safar Hindiston uni Oy yuzasiga muvaffaqiyatli qo‘ndirishni rejalashtirmoqda.