Ikki oy oldin qamalgan Urganch shahrining sobiq hokimi ozodlikka chiqadi 

Xorazm viloyati, Urganch shahri hokimi lavozimida ishlagan Shuhrat Abdullayev ozodlikka chiqadi. 

Oliy sud kassatsiya instansiyasining 29 avgustdagi ajrimiga muvofiq, Shuhrat Abdullayev o‘z aybiga iqrorligi, qilmishidan pushaymonligi, muqaddam sudlanmagani va ish bo‘yicha yetkazilgan moddiy zararni ixtiyoriy ravishda to‘liq qoplagani inobatga olindi va qamoqdan ozod qilinishi belgilandi. Shu bilan birga, bazaviy hisoblash miqdorining 500 baravari (165 mln so‘m) miqdorida jarima jazosi tayinlandi. 

2023 yil 4 iyul kuni Jinoyat ishlari bo‘yicha Xiva tuman sudi Shuhrat Abdullayevni 2018-2020 yillar mobaynida Urganch shahar hokimi lavozimida ishlagan davrida Jinoyat kodeksining 209-moddasi (mansab soxtakorligi) 2-qismi “a” bandi va 229-4-moddasi (yer berish tartibini buzish) 2-qismi “a”, “b” bandlarida nazarda tutilgan jinoyatlarni sodir etganlikda aybli deb topib, 2 yilga davlat organi, davlat ishtirokidagi tashkilot va fuqarolarning o‘zini o‘zi boshqarish organlarida mansabdor va moddiy javobgar shaxs lavozimlarida ishlash huquqidan mahrum qilgan holda 3 yil muddatga ozodlikdan mahrum qilish jazosi tayinlagan edi. Xorazm viloyati sudi appelyatsiya instansiyasi ajrimi bilan birinchi instansiya sudining hukmi o‘zgarishsiz qoldirildi. 

Oliy sudning Jinoyat ishlari bo‘yicha sudlov hay’ati Shuhrat Abdullayevning aybiga iqrorligi, qilmishidan pushaymonligi, muqaddam sudlanmagani va yetkazilgan moddiy zarar qoplanganini inobatga olib, unga nisbatan ozodlikdan mahrum qilish bilan bog‘liq bo‘lmagan jazo tayinlash haqida keltirilgan protestni qanoatlantirdi.

• Shuhrat Abdullayev 1967 yilda Xorazm viloyatida tug‘ilgan. 2018−2020 yillar mobaynida Urganch shahar hokimi lavozimida faoliyat yuritgan.