Xitoy Farg‘onada elektrobus ishlab chiqarish loyihacini amalga oshirmoqchi

Farg‘ona viloyat hokimligida Xitoyning Dongfeng Motor, Luoyang Grasen Power Technology va Tunghsu Group kabi yirik kompaniyalari vakillaridan iborat investorlar delegatsiyasi bilan uchrashuv bo‘lib o‘tdi.

Viloyat hokimligi axborot xizmati ma’lumotiga ko‘ra, muloqot chog‘ida Farg‘ona viloyatida Xitoyning eng yirik avtokonserni Dongfeng Motor tomonidan amalga oshirish rejalashtirilayotgan Dongfeng elektrobuslarini ishlab chiqarish loyihasi, shuningdek, Luoyang Grasen Power Technology kompaniyasi tomonidan rejalashtirilayotgan elektromobillar uchun zaryadlovchi qurilmalar, Tunghsu Group tomonidan quyosh panellarini ishlab chiqarish loyihalarini amalga oshirish masalalari muhokama qilindi.

Dongfeng Motor tomonidan rejalashtirilayotgan loyihaning birinchi bosqichida 4 gektar maydonda 45 million AQSh dollar to‘g‘ridan to‘g‘ri xorijiy investitsiya yo‘naltirish hisobiga elektrobuslarni ishlab chiqarish yo‘lga qo‘yilsa, 2025 yilda yana 50 million dollar investitsiya kiritish hisobiga amalga oshirish ko‘zda tutilayotgan ikkinchi bosqichda elektrotransportlar akkumulyatorlarini hamda boshqa butlovchi qismlarini mahalliylashtirish, shuningdek, hududlarda texnik servis xizmatlarini tashkil etish belgilangan.

Elektromobillar uchun zaryadlovchi qurilmalarni ishlab chiqarishda Xitoyning eng yirik kompaniyasi bo‘lgan Luoyang Grasen Power Technology kompaniyasi tomonidan rejalashtirilayotgan loyiha bo‘yicha kiritilishi ko‘zda tutilayotgan investitsiya hajmi 30 million dollarni tashkil etishi ko‘zda tutilgan.

Tunghsu Group kompaniyasi rahbarlari esa viloyatda quyosh panellari ishlab chiqarish loyihasiga 50 million dollar investitsiya yo‘naltirish maqsadida ekanliklarini ma’lum qilishdi. Ushbu loyihalar hozirgi muzokaralar holatida Furqat tumanida amalga oshirilishi rejalashtirilmoqda.