Jismoniy va yuridik shaxslarga QQSni to‘liq qaytarib berish tizimi kengaytiriladi

Prezident “O‘zbekiston – 2030” strategiyasini 2023 yilda sifatli va o‘z vaqtida amalga oshirish chora-tadbirlari to‘g‘risida”gi qarorni imzoladi.

2024 yil 1 yanvardan boshlab jismoniy va yuridik shaxslarga qo‘shilgan qiymat solig‘ini to‘liq qaytarib berish tizimi quyidagilar hisobidan kengaytiriladi.

xorijiy turistlarga – O‘zbekiston xalqaro aeroportlarida O‘zbekiston hududida sotib olingan va Tax free tizimi bo‘yicha rasmiylashtirilgan mahsulotlar uchun;

turoperatorlarga – xorijiy kontragentlar bilan shartnomalar doirasida ko‘rsatilgan eksport xizmatlari uchun.

Avvalroq prezident qarori bilan soliq organlarining kameral tekshiruvlar bo‘yicha vakolatlari qisqartirilgandi. 

Soliqqa oid ishlar iqtisodiy sudlardan ma’muriy sudlarga o‘tkazilib, soliq majburiyati bo‘yicha da’vo qilish muddati 5 yildan 3 yilga tushiriladi.