Misr tomonidan taqdim etilgan gepatitga qarshi dorining navbatdagi turkumi O‘zbekistonga yetkazildi

Misr hukumati tomonidan mamlakat uchun insonparvarlik yordami tariqasida ajratilgan S gepatitiga qarshi dori vositasining navbatdagi turkumi Toshkentga jo‘natildi, deb xabar bermoqda «Dunyo».

Ushbu loyiha O‘zbekiston prezidentining Misrga amalga oshirgan rasmiy tashrifi davomida erishilgan kelishuvlar hamda mamlakat rahbarining S gepatitiga chalingan bemorlarni 100 foiz davlat hisobidan davolash bo‘yicha tashabbusi ijrosi doirasida amalga oshirilmoqda.

Dori vositasining navbatdagi turkumini O‘zbekistonga jo‘natish bo‘yicha kelishuv mamlakat diplomatlarining Misr sog‘likni saqlash vaziri bilan olib borgan samarali muzokaralari natijasidir.

Misr hukumati tomonidan mamlakatga insonparvarlik yordam sifatida ajratilgan S gepatitiga qarshi dori vositalarining o‘n yettinchi partiyasi shu yil 4 noyabr kuni Uzbekistan Airways aviakompaniyasi ko‘magida Sharm-al-Shayxdan Toshkentga yetkazib berildi.