U devoriy gazeta sifatida emas, haqiqiy gazeta ko‘rinishida tayyorlangan bo‘lib, maktab hayotiga oid ma’lumotlar, o‘quvchilar ijodi va tafakkurini boyituvchi maqolalar, aqlni charxlovchi krossvord va she’rlarni o‘z ichiga olgan.
Sirdaryo viloyati, Mirzaobod tumanidagi 15-umumta’lim maktabining ona tili va adabiyot fani o‘qituvchisi Yorqinjon Hayitboyev o‘z hisobidan «Bilimdon» gazetasini ta’sis etdi. Bu haqda Maktabgacha va maktab ta’limi vazirligi xabar berdi.
Qayd qilinishicha, 5 dekabr kuni gazetaning ilk soni nashrdan chiqqan. U devoriy gazeta sifatida emas, haqiqiy gazeta ko‘rinishida tayyorlangan bo‘lib, maktab hayotiga oid ma’lumotlar, o‘quvchilar ijodi va tafakkurini boyituvchi maqolalar, aqlni charxlovchi krossvord va she’rlarni o‘z ichiga olgan.
Yorqinjon Hayitboyev so‘zlariga ko‘ra, gazeta oyda bir marta, 30 ta adadda chiqariladi va bunga ko‘p mablag‘ talab etilmaydi.
«Maktabda yosh pedagog sifatida ish boshlaganim uchun yangilik olib kirishga harakat qildim. Jadidlar o‘z faoliyati davomida gazeta va jurnallarga alohida e’tibor berishgan. Biz faqat jadidlarni ulug‘lash, ular bilan faxrlanish bilan chegaralanmay, ularga izdosh bo‘lishimiz kerak. Buning uchun esa amaliy ishlar zarur. Gazetani qaysi pulga chiqaryapsan, degan savol bo‘ladi, albatta. Biz gazetani bir oyda bir marta 30 nusxada chop etishni reja qildik. 30 nusxa chiqarish uchun 60 dona oq qog‘oz kerak ekan. Buni o‘z hisobimdan qilyapman va bundan xursandman. Avvalo u qadar ko‘p pul ketmaydi. Quvonarlisi, o‘quvchilarimizning gazeta mutolaa qilishga bo‘lgan muhabbati oshdi. Ota-onalar ham xursand. Eng asosiysi, maktabda ma’rifat, adabiyot, ma’naviyat ko‘zgusi — yangi gazeta paydo bo‘ldi», dedi Hayitboyev.
