Toshkentda 11-sinf o‘quvchisi maktab oshxonasida «dimavushka» tutatdi. Holat yuzasidan tergovga qadar surishtiruv boshlandi

Ijtimoiy tarmoqlarda Yunusobod tumanidagi 97-maktab o‘quvchilari maktab oshxonasida kuchli tutun chiqaruvchi moddani tutatgani haqida xabarlar tarqaldi. Toshkent shahar MMTB holat yuzasidan ma’lumot berdi.

Foto: Videodan kadr

Qayd etilishicha, mazkur holat Toshkent shahar maktabgacha va maktab ta’limi boshqarmasi ishchi guruhi tomonidan o‘rganildi.

Unga ko‘ra, 2023 yil 14 dekabr kuni soat 10:15 larda Yunusobod tumanidagi 97-sonli umumta’lim maktabining oshxonasida 11-«A» sinf o‘quvchisi I.J. tanaffus vaqtida yonida bo‘lgan «dimavushka» nomli qo‘lbola yasalgan kuchli tutun chiqaruvchi moddani tutatganligi aniqlangan.

Bu hodisani shu maktabning 9-«V» sinf o‘quvchisi A.A. o‘zining uyali telefoni orqali videotasvirga olgan va ijtimoiy tarmoqdagi sahifasiga joylashtirgan hamda tarqatgan.

Hozirda mazkur holat yuzasidan tergovga qadar surishtiruv ishlari olib borilayotgani ma’lum qilingan.