Hindistonning Marion Biotech kompaniyasi ishlab chiqargan “Dok-1 Maks” siropi O‘zbekistonda 68 nafar bolaning o‘limiga sabab bo‘lgan. Bu haqda ushbu ish bo‘yicha 10 yanvar kuni bo‘lib o‘tgan sud majlisida davlat ayblovchisi ma’lum qildi, deya xabar bermoqda Kun.uz muxbiri.
O‘tgan yil davomida ayblanuvchilar soni 65 nafar ekani aytib kelinayotgan edi. Yana 3 nafar qurbon borligi haqida bu holat bo‘yicha qo‘zg‘atilgan ikkinchi jinoyat ishining tergov xulosasidan ma’lum bo‘ldi. Ikkinchi ish doirasida 3 bolaning o‘limidan tashqari, kamida 16 bola nogiron bo‘lib qolgani, 2 bola yengil jarohat olgani holatlari tergov qilingan.
Birinchi jinoyat ishi doirasida ayblov e’lon qilingan 21 nafar shaxsdan 17 nafari ikkinchi jinoyat ishi doirasida ham figurantlar sanaladi. 5 yanvar kungi sud majlisida bu ikkita ish bo‘yicha sud jarayoni birlashtirilgan edi.
5 yanvar kuni, shuningdek, sudlanuvchilar soni 21 nafardan 23 nafarga yetgani ma’lum bo‘ldi. Dekabr oyida sud JPKning 416-417-moddalariga asosan qo‘shimcha tergov o‘tkazish bo‘yicha ajrim chiqargandi. Shunga ko‘ra, tergov organlari yana 2 nafar shaxsga nisbatan ayb e’lon qilgan.
Toshkent shahar sudining bugun, 10 yanvar kungi majlisida prokuror bu ikki shaxsga nisbatan ayblov xulosasini o‘qib eshittirdi.
Ulardan biri – Dori vositalari, tibbiy buyumlar va tibbiy texnika ekspertizasi va standartlashtirish davlat markazining Farmakologiya qo‘mitasida bosh mutaxassis lavozimida ishlagan Tolipov Farrux Ma’murovichdir.
Farrux Tolipov yuqorida ko‘rsatilgan lavozimda ishlab, ya’ni davlat xizmatchisi bo‘la turib takroran pora olish, bir guruh shaxslar bilan oldindan til biriktirib muayyan huquq beradigan rasmiy hujjatlarni qalbakilashtirish, bu hujjatlar qalbaki ekanini bila turib ulardan foydalanish bilan shug‘ullanib kelganlikda ayblanyapti.
O‘zbekistonda o‘rnatilgan tartibga asosan, dori vositasi ishlab chiqaruvchi davlatdan tashqari
