BMT: Ukrainada 10 200 dan ortiq tinch aholi vakili halok bo‘ldi

Birlashgan Millatlar Tashkiloti ma’lumotlariga ko‘ra, 2022 yilning fevralida Rossiya hujumi boshlanganidan beri Ukrainada 10 200 dan ortiq tinch aholi halok bo‘lgan. 2023 yil dekabr oyi oxirida Rossiya havo hujumlari kuchayganidan buyon Ukraina bo‘ylab 125 nafar tinch aholi halok bo‘ldi va 550 dan ortiq tinch aholi yaralandi, dedi 10 yanvar, chorshanba kuni BMTning Gumanitar masalalarni muvofiqlashtirish boshqarmasi (GMMB) direktori Edem Vosornu Nyu-Yorkda.

Vosornu, BMT Xavfsizlik kengashining Ukrainadagi urushga bag‘ishlangan yig‘ilishida so‘zlagan nutqida, shuningdek, so‘nggi ikki yillik urush davomida 19 300 dan ortiq tinch aholi jarohatlanganini va Rossiyaning so‘nggi qator havo hujumlari uylar, maktablar, shifoxonalar, elektr ta’minoti va boshqa muhim fuqarolik infratuzilmasining keng miqyosda vayron bo‘lishiga sabab bo‘lganini aytdi.

Birlashgan Millatlar Tashkiloti Ukrainadagi urush qurbonlarining haqiqiy soni hujjatlashtirilganidan ancha yuqori ekanligini doimo ta’kidlab keladi. Birlashgan Millatlar Tashkilotining Qochqinlar bo‘yicha Oliy komissarligi ma’lumotlariga ko‘ra, urush boshlanganidan beri 6,3 millionga yaqin ukrainalik boshqa davlatlarga qochib o‘tgan. Ularning aksariyati – 5,9 millionga yaqini Yevropa davlatlarida istiqomat qilyapti. Ukrainaning o‘zida yana 3,7 million kishi ko‘chirilgan.