Taqdirlash marosimida Zalujniy ikki bor Zelenskiyni quchoqlab oldi.
Bir kun avval Ukraina Qurolli kuchlari bosh qo‘mondoni lavozimidan ozod etilgan armiya generali Valeriy Zalujniyga mamlakat eng oliy mukofoti – Ukraina Qahramoni unvoni berildi. Mukofotni Ukraina prezidenti Volodimir Zelenskiy topshirgan.
Bu boradagi prezident farmonida mukofot Zalujniyga «Ukraina suverenitetini himoya qilish yo‘lidagi ulkan xizmatlari uchun» berilgani aytilgan. Zalujniyga Ukraina Qahramoni unvoni bilan birga «Oltin Yulduz» ordeni ham berildi.
Zalujniydan tashqari Ukraina Mudofaa vazirligi bosh razvedka tashkiloti rahbari general Kirill Budanov ham Ukraina Qahramoni unvoniga munosib ko‘rilgan. OAVda Budanov Zalujniyning o‘rniga bosh qo‘mondonlik uchun nomzodlardan biri sifatida qaralayotgani aytilgandi.
Harbiylarga unvonlarni topshirish marosimida bir kun avval Zulujniy o‘rniga bosh qo‘mondon etib tayinlangan Oleksandr Sirskiy ham qatnashgan.
