TIVda hamda O‘zbekiston prezidenti huzuridagi Strategik va mintaqalararo tadqiqotlar institutida Britaniya Tashqi ishlar vazirligining Afg‘oniston bo‘yicha tashqi va ko‘p tomonlama aloqalar departamenti boshlig‘i Nikola Rigini boshchiligidagi delegatsiyasi bilan uchrashuvlar bo‘lib o‘tdi.
Foto: Dunyo
«Dunyo» xabariga ko‘ra, muzokaralar chog‘ida tomonlar Afg‘onistondagi vaziyat bilan bog‘liq keng ko‘lamli masalalarni muhokama qildilar. Afg‘onistonga gumanitar yordam ko‘rsatish va ushbu mamlakat iqtisodiyotini tiklashga ko‘maklashish bo‘yicha xalqaro hamkorlik masalalariga alohida e’tibor qaratildi.
Britaniya TIV vakillari Toshkent va Londonning Afg‘onistonda uzoq muddatli tinchlik o‘rnatish bo‘yicha umumiy qarashlari va yondashuvlari o‘xshash ekanligini ta’kidladi.
Tomonlar afg‘on masalalari bo‘yicha konstruktiv hamkorlikni davom ettirish va qo‘shni mamlakatdagi vaziyatni normallashtirish bo‘yicha xalqaro hamjamiyat sa’y-harakatlarini muvofiqlashtirishga kelishib oldi.
