O‘zbekiston so‘zanasi Britaniya nashriyoti kitobida: yangi loyiha muhokama qilinyapti

O‘zbekiston elchisi Ravshan Usmanov Britaniyaning Hali Publishing nashriyot kompaniyasi bosh muharriri Ben Evans bilan uchrashuv o‘tkazdi. Bu haqda “Dunyo” AA xabar qildi.

Uchrashuvda Ben Evans Hali Publishing nashriyotining keng imkoniyatlari, xususan, nodir kitob va adabiyotlarni nashrga tayyorlash hamda bu jarayonda zamonaviy innovatsiyalarni qo‘llash tajribasi haqida ma’lumot berdi.

Uning ta’kidlashicha, kompaniya ayni paytda o‘zbek milliy matolari va so‘zanalariga bag‘ishlangan kitobni nashr etish arafasida. Tomonlar mazkur loyiha doirasida O‘zbekistonning manfaatdor idora va tashkilotlari bilan hamkorlik aloqalarini yo‘lga qo‘yish masalalarini ham muhokama qildi.

Suhbat yakunida Hali Publishing bilan O‘zbekistonning tegishli idora va tashkilotlari o‘rtasida hamkorlik aloqalarini o‘rnatish bo‘yicha kelishuvga erishildi.

Ma’lumot uchun, Hali Publishing 1978 yilda tashkil topgan bo‘lib, Britaniyada joylashgan nufuzli nashriyot kompaniyasi hisoblanadi. Nashriyot asosan antik va zamonaviy qo‘l mehnati bilan tayyorlangan tarixiy va osori-atiqalarga bag‘ishlangan nashrlarni tayyorlashga ixtisoslashgan.