Rossiya va O‘zbekiston sobiq fuqarolarini pensiya bilan ta’minlash masalasini hal qilishni rejalashtirmoqda

Rossiya va O‘zbekiston sobiq fuqarolarini pensiya bilan ta’minlash masalasini hal qilishni tezlashtirishni rejalashtirmoqda. Bu haqda Vladimir Putinning O‘zbekistonga davlat tashrifi doirasidagi muzokaralar yakunlari bo‘yicha imzolangan ikki davlat qo‘shma bayonotida aytiladi. 

Eslatib o‘tamiz, 2023 yil 1 yanvarda Rossiya MDH davlatlari fuqarolarining pensiya ta’minoti sohasidagi huquqlarini kafolatlash to‘g‘risidagi 1992 yilgi kelishuvni denonsatsiya qilgan edi. 

Shundan so‘ng, Rossiya hukumati har bir mamlakat bilan alohida yoki ittifoqqa birlashgan davlatlar guruhi (masalan, Yevroosiyo iqtisodiy ittifoqi) bilan pensiya to‘lash to‘g‘risida shartnomalar tuza boshladi. 

Bunday shartnoma O‘zbekiston bilan hali tuzilmagan, shu bois Rossiyaga ko‘chib borgan va 2023 yil 1 yanvardan keyin pensiya yoshiga yetgan sobiq fuqarolarning Rossiya hududidan tashqarida to‘plagan mehnat tajribasi pensiya tayinlashda hisobga olinmaydi.