Venesuela hukumati 2 ming namoyishchi qo‘lga olinganini e’lon qildi

Venesuelada mamlakat hukmdori Nikolas Maduro uchinchi bor g‘olib deb e’lon qilingan prezidentlik saylovlaridan so‘ng rasmiylar namoyishchilarga nisbatan qattiq choralar ko‘rishini e’lon qildi. Namoyishlar chog‘ida 2 ming kishi qo‘lga olindi, dedi Maduro 3 avgust kuni. O‘z tarafdorlari bilan gaplashar ekan, u ushlanganlarni Tokoron va Tokuyito qattiq rejimli qamoqxonalarga jo‘natishga va’da berdi. «Bu safar rahm-shafqat bo‘lmaydi», deb tahdid qildi u.

Muxolifat namoyishlarni davom ettirishga va’da berdi

Shu kuni mamlakat bo‘ylab minglab odamlar muxolifat yetakchisi Mariya Korina Machado tashabbusiga ko‘ra norozilik namoyishi o‘tkazdi. U hibsga olinishidan qo‘rqib so‘nggi bir necha kun yashirinib yurganidan so‘ng Karakasdagi mitingda qatnashdi. Venesuela rasmiylarining muxoliflari hech qachon bunchalik kuchli bo‘lmagan, rejim esa zaif, deydi u. 

«Biz ko‘chalarni tark etmaymiz», deb ta’kidladi Machado. Mitingda prezidentlik saylovlarida muxolifat nomzodi Edmundo Gonsales Urrutia ishtirok etmagan.

Venesuelada saylovlar va namoyishlar

Iyul oyida bo‘lib o‘tgan prezidentlik saylovlaridan so‘ng Venesuela hukumati nazorati ostidagi Milliy saylov kengashi avtoritar siyosatchini saylovchilarning 51,2 foizi qo‘llab-quvvatlaganini iddao qilib, mamlakatni 2013 yildan beri boshqarib kelayotgan Maduroni rasman g‘olib deb tan oldi. Biroq, ayrim saylov okruglari bo‘yicha ovoz berish natijalari hali e’lon qilinmagan. Xalqaro kuzatuvchilarga saylovlarda ishtirok etishiga ruxsat berilmadi.

O‘z navbatida, muxolifat o‘z nomzodi Edmundo Gonsales Urrutianing g‘alaba qozonganini ta’kidlamoqda, ularga ko‘ra, u butun 67 foizga yaqin ovoz to‘plagan. Maduroning raqiblari Venesuela bo‘ylab to‘g‘ridan to‘g‘ri saylov uchastkalaridan olingan byulletenlarning 80 foizdan ortig‘ini e’lon qildi. Saylovdan keyin butun mamlakat bo‘ylab natijalar soxtalashtirilishiga qarshi namoyishlar boshlandi.

Foro Penal nodavlat tashkilotiga ko‘ra, e’lon qilingan saylov natijalariga qarshi namoyishlar chog‘ida kamida 16 kishi halok bo‘lgan. Prezident Maduro Gonsales va Machadoni terrorchilikda ayblab, ularga 20 yilgacha qamoq jazosi bilan tahdid qilgan.

AQSh muxolifat nomzodini saylov g‘olibi deb tan oldi

Oq uy Edmundo Gonsales Urrutiani saylov g‘olibi deb tan oldi va byulletenlarni qayta ishlashda «jiddiy xatolar»ga yo‘l qo‘yilganini bildirdi. Vashingtonda mamlakat saylov komissiyalari xalqaro hamjamiyat talabiga qaramay, saylov natijalarini taqdim etmagani uchun keskin tanqid qilindi.