YeI Ukrainaga Rossiya bilan mojaro boshlanganidan beri 108 mlrd yevrolik yordam ko‘rsatdi

Yevropa Ittifoqi Ukrainaga Rossiya Federatsiyasi bilan mojaro boshlanganidan beri umumiy qiymati 108 milliard yevro miqdorida moliyaviy, gumanitar va harbiy yordam ko‘rsatdi.

Bu haqda Yevrokomissiya raisi Ursula fon der Lyayyen X ijtimoiy tarmog‘ida yozdi.

Siyosatchi mojaroning birinchi kunidanoq Bryussel Kiyevga yaqin bo‘lganiga e’tibor qaratdi. «Yevropa Ittifoqi va unga a’zo davlatlar Ukrainaga taxminan 108 milliard yevro miqdorida yordam ko‘rsatdi», dedi Ursula fon der Lyayyen.

Yevrokomissiya rahbari Kiyev bu mojarodan g‘olib sifatida chiqib ketishiga ishonch bildirdi.

«Yevropa Ittifoqi Ukraina va uning xalqini kerak bo‘lgancha qo‘llab-quvvatlashda davom etadi», - dedi u.

YeI ma’lumotlariga ko‘ra, e’lon qilingan mablag‘ning 52 milliard yevrosi Kiyev uchun moliyaviy, budjet va gumanitar yordamga, 39 milliard yevrosi harbiy yordamga sarflangan. Yevropa Ittifoqi davlatlarida boshpana topgan ukrainaliklar uchun 17 milliard yevro yo‘naltirilgan.