Britaniya muzeyida «Ipak yo‘llari» ko‘rgazmasi o‘z ishini boshlaydi

Tez kunda mashhur Britaniya muzeyida «Ipak yo‘llari» ko‘rgazmasi o‘z ishini boshlaydi. Bu haqda prezident yordamchisi Saida Mirziyoyeva o‘zining Telegram kanaliga yozib qoldirdi.

«O‘zbekistondan olib boriladigan noyob osori atiqalar boy madaniy merosimizni, diyorimizning Ipak yo‘li tarixidagi muhim o‘rnini aks ettiradi», — deb yozadi Mirziyoyeva.

Qayd etilishicha, Britaniya muzeyida namoyish etiladigan eksponatlar V-X asrlar oralig‘ida Ipak yo‘li bo‘ylab harakatlangan insonlar, mahsulot va g‘oyalar madaniy hamda tarixiy aloqalarning rivojlanishiga qanday xizmat qilganini ko‘rsatadi. Ko‘rgazma 2024 yil 26 sentabrdan 2025 yil 23 fevralga qadar tashrif buyuruvchilar uchun ochiq bo‘ladi.

 

 

 

 

Posmotret etu publikatsiyu v Instagram

 

 

 

 

 

 

 

 

 

 

 

Publikatsiya ot Saida Mirziyoyeva (@saida_mirziyoyeva)

O‘zbekiston Madaniyat va san’atni rivojlantirish jamg‘armasi «Ipak yo‘llari» ko‘rgazmasi uchun Samarqand davlat muzey-qo‘riqxonasi hamda O‘zbekiston davlat san’at muzeyida saqlanayotgan 14 ta eksponatni taqdim etishi to‘g‘risida iyun oxirlarida xabar berilgan edi.

Ular orasida Markaziy Osiyoning Buyuk Ipak yo‘li tarixidagi ahamiyatiga dalolat bo‘luvchi Varaxsha saroyi alvon mehmonxonasining devoriy surati, qopqoqli suyakdon, so‘g‘d yozuvi tushirilgan kumush idish, Kofirqal’a xarobasiga oid ko‘za va boshqa noyob arxeologik topilmalar mavjud.