Samarqandda yo‘lovchi avtobusi traktor tirkamasi bilan to‘qnashdi

Avtobus yo‘lning belgilangan qismidan qayrilib olayotgan traktor tirkasiga borib urilgan.

Foto: IIB YHXB axborot xizmati

Samarqand viloyatida yo‘lovchi avtobusi va traktor ishtirokida yo‘l-transport hodisasi sodir bo‘ldi. Viloyat IIB YHXB axborot xizmatining xabar berishicha, hodisa 2024 yil 30 oktyabr kuni soat 21:00 larda ro‘y bergan.

M-37 xalqaro avtomobil yo‘lining Narpay tumanidan o‘tuvchi qismida harakatlanayotgan YUTONG rusumli avtobus yo‘lning belgilangan qismidan qayrilib olayotgan TTZ traktorining tirkamasiga kelib urilgan. Oqibatda avtobus yo‘lovchisi shifoxonaga yotqizilgan.

Qayd etilishicha, holat yuzasidan Narpay tumani IIB JXX YHXB tomonidan dastlabki surishtiruv ishlari olib borilmoqda.

“Barcha haydovchilardan transport vositasini boshqarish davomida oraliq masofani saqlagan holda yo‘l harakati qoidalariga amal qilishlarini so‘rab qolamiz”, deyiladi xabarda.

Tayyorlagan: Ғайрат Йўлдошев

#Samarqand #YTH