Dunyodagi zararli chiqindilarning bor-yo‘g‘i 1 foizi Markaziy Osiyo mamlakatlariga to‘g‘ri keladi – To‘qayev

Qozog‘iston prezidenti Qosim-Jo‘mart To‘qayev BMT Iqlim o‘zgarishi bo‘yicha doiraviy konvensiyasi ishtirokchilari konferensiyasi doirasida o‘tkazilayotgan iqlim bo‘yicha jahon yetakchilarining sammitida (COP29) ishtirok etdi.

To‘qayev Qozog‘iston global iqlim kun tartibini qo‘llab-quvvatlashini tasdiqladi va iqlim o‘zgarishiga qarshi kurashda xalqaro hamkorlik muhimligini qayd etdi.

«Dunyodagi zararli chiqindilarning bor-yo‘g‘i 1 foizi Markaziy Osiyo mamlakatlariga to‘g‘ri keladi. Shunga qaramay, bu mintaqa ko‘plab iqlim tahdidlariga duchor bo‘lmoqda. Tabiatdagi o‘zgarishlarga javob berish choralari samaradorligini oshirish uchun biz sun’iy intellekt, sun’iy yo‘ldoshning ilg‘or texnologiyalaridan, xavf-xatarlar, suv va yer resurslari haqida erta ogohlantirish uchun biz samaraliroq boshqaradigan boshqa raqamli vositalardan faol foydalanishimiz kerak», dedi u.

Davlat rahbari Qozog‘iston o‘z oldiga 2060 yilgacha uglerod neytralligiga erishishni yuksak maqsad qilib qo‘yganini eslatdi.

To‘qayev bu vazifani bajarishda real moliyalashtirish manbalari va zamonaviy texnologiyalarga tayanishini aytdi. Shuningdek, u «Yangi jamoaviy iqlimni moliyalashtirish maqsadi» (NCQG) doirasida tabiiy o‘zgarishlarga moyil bo‘lgan hududlarga, ayniqsa dengizga chiqish imkoni bo‘lmagan rivojlanayotgan mamlakatlarga alohida e’tibor qaratish zarurligini ta’kidladi.