Oliy sud: 10 oyda 4 934 kishi sud zalida qamoqdan ozod qilindi

O‘zbekistonda 10 oyda qariyb 5 ming kishi sud zalida qamoqdan ozod qilindi. Bu haqda Oliy sud matbuot kotibi Aziz Obidov xabar berdi.

Sudlarning joriy yil yanvar-oktyabr oylaridagi faoliyatiga oid ayrim statistik raqamlar keltirildi. Unga ko‘ra, mazkur davrda 603 nafar shaxsga nisbatan oqlov hukmlari, 1 289 nafar shaxsga nisbatan esa jazo tayinlanmasdan hukm chiqarilgan.

Shuningdek, 10 866 nafar shaxsga oid jinoyat ishlari taraflar yarashgani munosabati bilan tugatilgan. 5 603 nafar shaxsga asossiz qo‘yilgan ayblar ularning ayblovidan chiqarilgan.

10 oyda 8 041 nafar shaxsning harakatlari aybiga muvofiq qayta kvalifikatsiya qilingan. 4 934 nafar shaxs sud zalida qamoqdan ozod etilgan.

Bundan tashqari, 27 302 nafar shaxs tayinlangan jazodan shartli ozod qilingan. 9 547 nafar shaxsga tayinlangan jazolar esa yengilrog‘i bilan almashtirilgan.