Suriyaning yangi hukumati Rossiya, Eron va Isroil tovarlari importini taqiqladi

Suriya Moliya vazirligi Rossiya, Eron va Isroil tovarlari importiga taqiq qo‘ydi, deb xabar beradi Al Araby. Ushbu davlatlardan keladigan mahsulotlar musodara qilinadi.

Shu bilan birga, Isroil tovarlariga nisbatan joriy etilgan embargo ancha yillardan beri amalda. Nashrning qayd etishicha, prezident Bashar Asad rejimi ag‘darilgach Suriyaga import tovarlarini olib kirish boshlangan: Damashq do‘konlarida Turkiya suvlari, Saudiyaning oziq-ovqat mahsulotlari, Amerika shokoladlari, shuningdek, Pepsi ichimligi paydo bo‘lgan.

Buning fonida yangi hukumat moliyaviy hisob-kitoblarni dollarda amalga oshirishga ruxsat bergan va yagona bojxona bojini joriy etgan. Ta’kidlanishicha, bu mahalliy ishlab chiqaruvchilar uchun xomashyo importini yengillashtirishga yordam beradi va sanoatni rag‘batlantiradi.

Yanvar boshlarida AQSh Suriya davlat muassasalari bilan ayrim moliyaviy operatsiyalar, xususan, energiya resurslari uchun to‘lovlar, shuningdek, mamlakat Markaziy banki orqali o‘tkazmalarga qo‘yilgan taqiqni vaqtincha bekor qilgan.

Shu bilan birga, Rossiya yangi hukumat bilan munosabatlar noaniqligi va to‘lovlarda uzilish yuz berayotgani bois Suriyaga g‘alla yetkazib berishni to‘xtatgan. O‘z navbatida Suriyaning yangi hukumati hozirga qadar Rossiyaga Tartus portidagi qurollari va harbiy texnikalarini olib chiqib ketishga ruxsat bermayapti.

Maxar sun’iy yo‘ldosh suratlariga ko‘ra, qariyb 10 kun oldin Rossiya harbiylari portga katta miqdordagi texnikalarni — 100 dan ortiq yuk mashinalari, shuningdek, havo hujumidan mudofaa radarlarini olib kelgan. Ammo bularning barchasi bir joyda qimirlamay turibdi. Odamlar va texnikalarni evakuatsiya qiladigan yagona joy bu Xmeymim aviabazasi bo‘lib qolmoqda.