Rossiya dronlari Mikolayiv va Sumiga hujum qildi

Hujumlar natijasida ko‘p qavatli uylar va xususiy uylar zarar ko‘rgan, yong‘inlar boshlangan. Qurbonlar va jabrlanganlar haqida ma’lumot yo‘q.

Foto: Telegram / senkevichonline

21 yanvar, seshanba kuni kechqurun Rossiya armiyasi Mikolayiv shahriga yettita Shahed tipidagi dron bilan hujum qildi, dedi Mikolayiv oblasti davlat ma’muriyati rahbari Vitaliy Kim. Hujum natijasida turar joy binolari shikastlangan va yong‘in kelib chiqqan. Qurbonlar va jarohatlanganlar haqida ma’lumotlar yo‘q.

Mikolayiv meri Aleksandr Senkevich o‘zining Telegram-kanalida xususiy sektordagi vayronagarchiliklar haqida yozdi. «Vayronalar ostidan bir ayol chiqarib olindi. Yong‘in bor. Infratuzilma obektida vayronagarchilik va yong‘in. Qutqaruvchilar ham ishlamoqda», — dedi u.

Shu kuni kechqurun rus armiyasi Sumi shahridagi xususiy sektorga Shahed dronlari bilan hujum qilib, bir nechta uylarga zarar yetkazdi.