Qoʻshimcha funksionallar
-
Tungi ko‘rinish
Harbiy havo kuchlari jangovar qo‘mondonligi tashkil etildi
O‘zbekiston prezidenti harbiy aviatsiya va havo hujumidan mudofaa bo‘linmalarining jangovar imkoniyatlarini ikki barobar oshiradigan tarixiy farmonni imzoladi, deya ma’lum qildi mudofaa vaziri Shuhrat Xolmuhammedov. Hujjat bilan, Harbiy havo kuchlari jangovar qo‘mondonligi, yuqori aniqlikdagi aviatsiya texnikalari va uchuvchisiz aviatsiya komplekslari bilan qurollangan yangi bo‘linmalar tashkil etilmoqda.
O‘zbekistonda Havo hujumidan mudofaa qo‘shinlari va Harbiy havo kuchlari qo‘mondonligi negizida Qurolli Kuchlar Harbiy havo kuchlari jangovar qo‘mondonligi tashkil etilmoqda. Bu haqda davlat rahbari huzuridagi taqdimotdan keyin mudofaa vaziri Shuhrat Xolmuhammedov ma’lum qildi.
Vazirning so‘zlariga ko‘ra, prezident Shavkat Mirziyoyev Harbiy havo kuchlari jangovar qo‘mondonligini tashkil etishga oid “tarixiy farmon”ni imzolagan (hujjat hali e’lon qilinmadi).
Yangi tashkil etilayotgan qo‘mondonlik zamonaviy raqamlashtirilgan boshqaruv tizimiga ega bo‘lishi ko‘zda tutilgan.
“Yuqori aniqlikdagi qurollarga ega aviatsiya texnikalari, uchuvchisiz aviatsiya komplekslari bilan qurollangan yangi bo‘linmalarni tashkil etish orqali harbiy havo kuchlarining jangovar qobiliyati va imkoniyatlarini oshirish bo‘yicha aniq chora-tadbirlar belgilanmoqda,
Albatta, ushbu farmon harbiy aviatsiya va havo hujumidan mudofaa bo‘linmalarining jangovar imkoniyatlarini ikki barobarga oshishiga, shuningdek, muhim va strategik obektlarni havo zarbalaridan himoyalash qobiliyatini yanada kuchaytirishga xizmat qiladi”, – dedi general Holmuhammedov “O‘zbekiston 24” telekanaliga bergan intervyusida.
Uning qo‘shimcha qilishicha, prezident Shavkat Mirziyoyev harbiy tibbiyot sohasidagi hamkorlikka doir O‘zbekiston–Turkiya hukumatlararo bitimni tasdiqlash to‘g‘risidagi qarorni ham imzolagan.
Bitimga ko‘ra, davolash ishi, stomatologiya, farmatsevtika, profilaktika, tibbiy kasb-hunar va hamshiralik kabi yo‘nalishlarda mutaxassislarni o‘qitish, qayta tayyorlash, malakasini oshirish, o‘zaro tajriba almashish va bemorlarni davolash borasida hamkorlik qilish belgilanmoqda.
