Qoraqalpog‘iston va Andijonda pul evaziga yer olib berishni va’da qilgan shaxslar ushlandi

Qoraqalpog‘iston Respublikasi va Andijon viloyatida yer maydonlarini olib berishni va’da qilgan firibgarlar ushlandi, deb xabar beradi Bosh prokuratura huzuridagi departamenti.

Qayd etilishicha, departamentning Taxtako‘pir tumani bo‘limi va boshqa huquqni muhofaza qiluvchi organlar xodimlari hamkorligida tezkor tadbir o‘tkazilgan. Tadbirda S.P. ismli shaxs fuqaro A.K.ning ishonchiga kirib, qalbaki hujjatlar asosida rasmiylashtirilgan Nukus shahri hududidagi 3,6 sotix yer uchastkasini 170 million so‘mga sotishga kelishib, ushbu pullarni firibgarlik yo‘li bilan olgan vaqtida ashyoviy dalillar bilan ushlangan.

Shu kabi, departamentning Andijon tumani bo‘limi tomonidan o‘tkazilgan tadbirda N.N. ismli shaxs fuqaro X.A.ga «U.D.» qo‘shma korxonasiga ajratilgan yer maydonining 4 sotixini go‘yoki kadastr bo‘limida ishlovchi tanishlari orqali 10,5 ming dollar evaziga turar joy sifatida rasmiylashtirib berishni va’da qilgan. U ushbu pullar hisobidan 5,5 ming dollarni olgan vaqtida ashyoviy dalillar bilan qo‘lga tushgan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Andijon va Navoiy viloyatlarida noqonuniy tarzda yer sotmoqchi bo‘lgan shaxslar ushlangani, Toshkentda davlat zaxirasida bo‘lgan 7 sotix yerni 175 ming dollarga sotmoqchi bo‘lgan shaxs qo‘lga olingani to‘g‘risida xabar berilgandi.