Andijon va Xorazmda noqonuniy ravishda yer maydonlarini sotmoqchi bo‘lgan shaxslar ushlandi

Ma’lum qilinishicha, Bosh prokuratura huzuridagi departamentning Andijon viloyati boshqarmasi va IIB xodimlari hamkorligida tezkor tadbir o‘tkazilgan. Tadbirda X.R. va D.M. ismli shaxslar (muqaddam sudlangan) o‘zaro til biriktirib, fuqaro A.Yu.ga Andijon tumanidagi «X.Ch.» fermer xo‘jaligiga qarashli ekin yer maydonining 8 sotixini 22 ming dollar evaziga kelgusida uy-joy qurishi uchun rasmiylashtirib berishni va’da qilgani aniqlangan. Ular oldindan 500 AQSh dollarini olgan vaqtida ashyoviy dalillar bilan ushlangan.

Shu kabi, departamentning Xorazm viloyati boshqarmasi va IIB xodimlari hamkorligida o‘tkazilgan tezkor tadbirda E.I va D.I. ismli shaxslar Urganch tumani Amir Temur massivi hududidagi 11 sotix yer maydonini fuqaro J.B.ga 180 million so‘mga sotishga kelishib, shundan 7,5 ming AQSh dollari va 7 million so‘mni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Andijon va Navoiy viloyatlarida noqonuniy tarzda yer sotmoqchi bo‘lgan shaxslar ushlangani, Toshkentda davlat zaxirasida bo‘lgan 7 sotix yerni 175 ming dollarga sotmoqchi bo‘lgan shaxs qo‘lga olingani to‘g‘risida xabar berilgandi. Shuningdek, Nukusda qalbaki hujjatlar asosida rasmiylashtirilgan 3,6 sotix yerni 170 mln so‘mga sotishga uringan fuqaro ashyoviy dalillar bilan qo‘lga tushgan edi.