AQSh hududida «Temir gumbaz» raketaga qarshi mudofaa tizimi yaratiladi

AQSh prezidenti Donald Tramp «Temir gumbaz» raketaga qarshi mudofaa tizimini yaratish bo‘yicha farmonni imzoladi, deb yozdi «Interfaks».

Prezident Pentagon rahbari Pit Hegsetga 60 kun ichida zamonaviy raketaga qarshi mudofaa tizimini joylashtirish loyihasi va rejasini taqdim etishni topshirdi.

Raketaga qarshi yangi mudofaa tizimi Qo‘shma Shtatlarni ballistik, tovushdan tez va ilg‘or qanotli raketalardan hamda boshqa havo tahdidlaridan himoya qilishi kutilmoqda. Loyiha Qo‘shma Shtatlar tomon uchirilgan raketalarni kuzatib boradigan ilg‘or kosmik tizimlarni ishlab chiqishni o‘z ichiga oladi.

Trampning fikricha, so‘nggi 40 yil ichida yangi avlod strategik qurollari, jumladan, ballistik, gipertovushli va qanotli raketalardan foydalanish tahdidi kuchaygan. «Kuch orqali tinchlikni targ‘ib qilish» uchun Qo‘shma Shtatlar «yangi avlod raketaga qarshi mudofaa qalqonini joylashtirish va qo‘llab-quvvatlash orqali» o‘z fuqarolarining mudofaasini ta’minlashi kerak, u muhim infratuzilmani har qanday xorijiy hujumdan himoya qilishni ta’minlashi kerakligini ta’kidladi.

«Temir gumbaz» tizimi AQSh ko‘magida Isroil tomonidan ishlab chiqilgan. U qisqa masofali raketalarni urib tushirish uchun mo‘ljallangan. 2011 yilda ishlay boshlaganidan beri tizim minglab raketalarni aniqladi va tutib oldi, jumladan, Hamas va Hizbullohga qarshi so‘nggi urush paytida. Isroil uning muvaffaqiyat darajasi 90 foizdan ortiq ekanini da’vo qiladi.