Rossiyada markaziy osiyolik migrantlar o‘rniga hindlarni jalb qilish taklif etildi

Hindistonlik mehnat migrantlari Markaziy Osiyodan kelgan xorijlik mutaxassislar o‘rniga yaxshi muqobil bo‘lishi mumkin, dedi Rossiya prezidenti huzuridagi Inson huquqlari kengashi a’zosi Kirill Kabanov. News.ru bilan suhbatda huquq himoyachisi Hindiston mehnat bozorida malakali ishchilarni topish mumkinligini ta’kidladi.

«Hindiston bizga ishchi kuchi taklif qilishga tayyor, shunday gap bor. Hindistondan ishchi olib kelish uchun ish vizasi talab qilinadi - bu nazorat. Ular mehnat vizasi bilan uyushqoq tarzda keladi. Ikkinchidan, ular uyushqoq tarzda, ma’lum bir ish uchun ma’lum bir ish beruvchiga keladi. Hindiston mehnat bozori malakali mutaxassislarni topish imkoniyatini taqdim etadi», deb tushuntirdi Kabanov.

Uning so‘zlariga ko‘ra, hozircha raqobat yo‘q, chunki Markaziy Osiyodan mehnat migrantlari ko‘p kelmoqda. Lekin, ularning aksariyati «hech qanday malakaga ega emas».

«Bizga Markaziy Osiyodan kelganlar 99% holatda hech qanday malakaga ega emas. Ular bu yerda o‘qishga harakat qilyapti, ammo yaxshi eplolmayapti. Shu nuqtai nazardan, Hindiston qiziqarli bo‘lishi mumkin, ammo bu yo‘nalishni rivojlantirish kerak. Boshqa davlatlardan migrantlarni olib kelishga muqobil yo‘l izlayotganimiz haqida suhbat boshlanishi bilanoq, darhol Qirg‘iziston va Tojikiston vakillari bilan uchrashuv bo‘lib o‘tdi. Ular nafaqat o‘z ishchi kuchini bizga joylashtirish, balki Rossiyaga radikal mafkurani tiqishtirishdan ham nihoyatda manfaatdor», deb xulosa qildi Kabanov.