Italiyalik jurnalistlar josuslik dasturi sabab hukumat ustidan prokuraturaga shikoyat qildi

Italiya milliy jurnalistlar federatsiyasi (FIEG) mamlakat hukumatiga nisbatan jinoyat ishi ochishni talab qilib, Rim prokuraturasiga shikoyat kiritdi. Jurnalistlar kasaba uyushmalari Italiya hukumati hamda parlamentini jurnalistlar va hukumat tanqidchilariga qarshi Graphite josuslik dasturidan foydalanish haqidagi so‘rovlariga javob berishdan bosh tortganlikda ayblamoqda.

Yanvar oyida Italiya OAV mamlakat maxsus xizmatlari telefonlariga Graphite o‘rnatilgan odamlar orasida surishtiruvlar bilan shug‘ullanuvchi jurnalist Franchesko Kanchellato ham borligi haqida xabar bergandi. Keyinroq The Guardian o‘z manbalariga tayanib Isroilning Paragon kompaniyasi (Graphite’ni yaratgan) Italiya hukumati dasturiy ta’minotdan foydalanish qoidalarini buzgani uchun u bilan shartnomani bekor qilgani haqida yozdi. Parlament maxsus xizmatlari o‘z faoliyati davomida dasturiy ta’minotdan foydalanganini tan olgan, biroq jurnalistlar kuzatuvga olinganini rad etgan.

Ammo FIEG bunga shubha bilan qaramoqda. «Franchesko Kanchellato o‘ziga nisbatan ushbu dastur qo‘llangan Italiyadagi yagona jurnalist bo‘lganmi? O‘ylashimizcha, yo‘q. Biz aniqlik xohlaymiz, biz jurnalistlar o‘z ishini xavotirsiz bajarishlarini istaymiz», — deydi kasaba uyushmalari bosh kotibi Alessandra Konstante.

FIEG josuslik dasturiy ta’minotidan qaysi idoralar va qanday holatlarda foydalanishi mumkinligiga oid ma’lumotlar ochiqlanishini talab qilmoqda.