O‘zbekistonda anderrayting faoliyati to‘g‘risidagi nizom tasdiqlandi

Anderrayting – emitentning qimmatli qog‘ozlarini chiqarilishini tashkillashtirish va/yoki kafolatli joylashtirish bo‘yicha xizmatlar ko‘rsatish faoliyati.

Anderrayter tomonidan qimmatli qog‘ozlarni kafolatli joylashtirish turlari quyidagilardan iborat:

• to‘liq kafolatli joylashtirish – chiqarilgan barcha qimmatli qog‘ozlarning joylashtirilishi;
• qisman kafolatli joylashtirish – chiqarilgan qimmatli qog‘ozlarning 10 foizdan kam bo‘lmagan qismining joylashtirilishi.

Emitent va anderrayter o‘rtasidagi qimmatli qog‘ozlarni joylashtirish jarayonidagi o‘zaro munosabatlar shartnoma bilan belgilanadi.

Shartnomaning majburiy shartlari:

• qimmatli qog‘ozlarni joylashtirish shartlari va anderrayting xizmatining xususiyati;
• emitent va anderrayter (birlashma) o‘rtasida qimmatli qog‘ozlarni joylashtirish jarayonida o‘zaro munosabatlarning shartlari va tartibi;
• emitent bilan anderrayter (birlashma) o‘rtasida qimmatli qog‘ozlarni joylashtirishdan keyingi o‘zaro munosabatlarning shartlari va tartibi (ikkilamchi bozorda joylashtirilgan qimmatli qog‘ozlarni anderrayter (birlashma) tomonidan qo‘llab-quvvatlash);
• anderrayting xizmatlari uchun haq to‘lash miqdori va tartibi;
• qonunchilik hujjatlariga muvofiq boshqa shartlar.

Qimmatli qog‘ozlarni joylashtirish jarayonida anderrayter tomonidan quyidagilarga yo‘l qo‘yilmaydi:

• investorlar uchun ahamiyatga ega bo‘lgan axborotni lozim darajada oshkor qilmasdan turib anderrayting xizmatlarini amalga oshirish;
• qimmatli qog‘ozlar bozorining alohida bir ishtirokchilariga yoki investorlarga boshqalarga nisbatan imtiyozli huquqlarni taqdim etish, bundan qonunchilikda nazarda tutilgan hollar mustasno;
• emitent bilan tuzilgan shartnomaning shartlarini bajarmaslik, lozim darajada bajarmaslik va (yoki) o‘z vaqtida bajarmaslik;
• emitentga, birlashma bo‘yicha hamkorlariga yoki investorlarga zarar yetkazishi mumkin bo‘lgan har qanday harakatlar.