Xitoyda tug‘ilish darajasini oshirish maqsadida oilalarga katta miqdorda pul mukofotlari taklif qilinmoqda

Xitoy shimolida joylashgan Xuxxoto shahri (Ichki Mo‘g‘uliston avtonom hududi ma’muriy markazi) rasmiylari tug‘ilish darajasini oshirish va jamiyat qarishiga qarshi kurashish bo‘yicha so‘nggi urinish doirasida pul mukofotlarini va’da qilmoqda, deb yozadi «Sinxua» agentligi.

Yangi qoidalarga ko‘ra, shahar ma’muriyati birinchi farzandi dunyoga kelgan juftliklarga 10 ming yuan miqdorida (qariyb 1,4 ming dollar) bir martalik subsidiya taklif qiladi.

Ikkinchi farzandni dunyoga keltirgan oila uchun esa bola besh yoshga to‘lgunga qadar har yili 10 ming yuandan to‘lanadi. Uchinchi yoki undan ortiq farzand uchun subsidiya bola 10 yoshga to‘lguniga qadar to‘lab boriladi.

Shahar sog‘liqni saqlash ishlari bo‘yicha qo‘mita rahbari o‘rinbosari Yan Chjunning ma’lum qilishicha, ushbu choralar tug‘ilishni oshirish va aholining ko‘payishini rag‘batlantirishga yo‘naltirilgan. «Ushbu siyosat shahardagi demografik rivojlanish bilan bog‘liq vaziyatni hal etishga qaratilgan yechim hisoblanadi», — deydi u.

Pekindan poyezdda ikki soatlik masofa uzoqligida joylashgan Xuxxoto shahrida 3,6 millionga yaqin odam istiqomat qiladi. Yan Chjunning aytishicha, 2019 yildan 2023 yilga qadar shaharda tug‘ilish darajasi kamaygan. 2023 yilda ushbu ko‘rsatkich har ming kishiga 5,58 ni tashkil etgan, 2024 yilga esa u biroz oshgan, chunki aksariyat juftliklar «Ajdaho yili»da farzand ko‘rishni xohlagan.

Eskpertlar tug‘ilishni rag‘batlantirish samardorligini hali tekshirib ko‘rish kerakligini aytayotganiga qaramay, ko‘plab juftliklar ushbu siyosatni olqishlamoqda.

Avvalroq Xitoyda 2024 yilda ro‘yxatdan o‘tkaziladigan yangi nikohlar soni ushbu hisobni yuritish boshlanganidan beri eng past ko‘rsatkichga tushib ketishi to‘g‘risida xabar berilgandi.