Kreml: Rossiya va AQSh 24 mart kuni g‘alla bitimini tiklash bo‘yicha muzokaralar o‘tkazadi

Rossiya va AQSh delegatsiyalari Qora dengiz akvatoriyasida kemalar xavfsizligiga oid «Qora dengiz tashabbusi»ning qayta tiklanish imkoniyati yuzasidan muzokaralar olib boradi. Bu haqda RF prezidentining yordamchisi Yuriy Ushakov ma’lum qildi.

Uning so‘zlariga ko‘ra, bu boradagi maslahatlashuvlar 24 mart kuni Ar-Riyodda bo‘lib o‘tadi. Rossiya delegatsiyasiga muzokaralarda Federatsiya Kengashining xalqaro ishlar bo‘yicha qo‘mitasi rahbari Grigoriy Karasin va Federal xavfsizlik xizmati direktori maslahatchisi Sergey Beseda boshchilik qiladi.

«Eslatib o‘taman, 2022 yil iyul oyida tegishli paket kelishuvlari BMT bosh kotibi Antoniu Guterrishning ko‘magi va ishtirokida imzolangan edi, biroq bu kelishuvlar to‘liq hajmda amalga oshmadi», — deydi Ushakov.

AQSh prezidentining maxsus vakili Stiv Uitkoff oldinroq AQSh va Rossiya delegatsiyasi 23 mart kuni Jiddada muzokaralar o‘tkazishini ma’lum qilgandi. Shu bilan birga, RF prezidentining matbuot kotibi Dmitriy Peskov 20 mart kuni tomonlar «oxirgi nyuanslarni kelishib olgani», muzokaralar 23 martda emas, boshqa kuni o‘tkazilishini aytgandi.

Peskovning so‘zlariga ko‘ra, Saudiya Arabistonida Qora dengiz g‘alla tashabbusini qayta tiklashdan tashqari, Rossiya—Ukraina urushini tugatishning boshqa «nyuanslari» va «jihatlari» muhokama qilinadi.

Qora dengiz g‘alla tashabbusi — bu Ukraina g‘allasini eksport qilish bo‘yicha kelishuv bo‘lib, u 2022 yil iyulidan 2023 yil iyuligacha amal qilgan. Ushbu bitim Turkiya va BMT vositachiligida imzolangan. Rossiya ushbu kelishuvning Rossiya o‘g‘itlariga oid qismi bajarilmaganini ta’kidlagan. Oradan bir yil o‘tib, Rossiya uni uzaytirishdan bosh tortgan.