Xitoylik ayol sobiq turmush o‘rtog‘idan uy ishlarini bajarib kelgani uchun 35 ming dollar undirdi

Xitoyda ajrashayotgan ayol sobiq turmush o‘rtog‘idan yillar davomida bajargan uy ishlari uchun 7 ming dollar talab qildi. Biroq sud uning holatini inobatga olib, to‘lov miqdorini 35 ming dollar etib belgiladi, deb xabar beradi South China Morning Post.

Qayd etilishicha, Xu va Van 13 yil davomida birga yashab, bir qizni tarbiya qilgan, ammo oxirgi yillarda ularning munosabati juda yomonlashgan. Navbatdagi janjaldan keyin ayol uydan chiqib ketgan va ajrashish uchun ariza bergan.

Mol-mulkni bo‘lish va qizining vasiyligini belgilashdan tashqari, Xu sud orqali bajargan uy ishlari uchun 7 ming dollar talab qilgan. Xitoy Fuqarolik kodeksiga ko‘ra, agar tomonlardan biri bu majburiyatlarni bajarmagan bo‘lsa, ikkinchi tomon uy ishlari uchun kompensatsiya talab qilish huquqiga ega.

Ta’kidlanishicha, ayol ushbu kompensatsiya uchun to‘la haqli hisoblanadi, chunki u turmushga chiqish uchun ishdan bo‘shagan va butun vaqtini qizini tarbiyalash va uy ishlarini tartibga keltirishga qaratgan. Turmush o‘rtog‘i esa uy ishlari bilan umuman shug‘ullanmagan.

Sud ish hujjatlarini o‘rganib chiqib, ayolning holatiga hamdardlik bildirgan, vasiylik va aliment to‘lash majburiyatini tasdiqlagan hamda uy ishlari uchun kompensatsiya summasini 35 ming dollargacha oshirgan.

Bu ajrashayotgan erkakni juda ajablantirgan, ammo sud vakillari unga «nikoh – bu ikki tomon uchun ham mehnat» ekanini tushuntirgan.

«Biz unga uy ishlari ko‘zga ko‘rinmas bo‘lishi mumkinligi, ammo bu ularning qiymati yo‘q degani emasligini aytdik. Uy ishlari er-xotin o‘rtasida teng taqsimlanishi kerak», – deydi sudya yordamchisi Fu Sayya.