Abduqodir Husanov Shavkat Mirziyoyevga «Manchester Siti» formasini sovg‘a qildi

Abduqodir Husanov 21 mart kuni «Yangi O‘zbekiston» bog‘ida o‘tgan Navro‘z tantanasida ishtirok etib, tadbirdan keyin prezident bilan uchrashdi.

O‘zbekiston milliy jamoasi hamda «Manchester Siti» himoyachisi Abduqodir Husanov Navro‘z tadbirlarida qatnashdi. Bu haqda O‘zbekiston futbol assotsiatsiyasi xabar berdi.

O‘zbekiston milliy jamoasi hamda «Manchester Siti» himoyachisi Abduqodir Husanov 21 mart kuni «Yangi O‘zbekiston» bog‘ida o‘tgan Navro‘z tantanasida ishtirok etib, tadbirdan keyin prezident Shavkat Mirziyoyevga imzosi tushirilgan «Manchester Siti»dagi libosini sovg‘a qildi.

E’lon qilingan suratdan ko‘rish mumkinki davlat rahbari bilan uchrashuvda Abduqodirga otasi Hikmat Hoshimov hamrohlik qilgan.

Husanov kuni 20 mart kuni Qirg‘izistonga qarshi o‘yinda ishtirok etgandi. U 25 mart kuni O‘zbekiston milliy jamoasi bilan Eronga qarshi bahsda maydonga tushishi kutilmoqda.

Eslatib o‘tamiz, Shavkat Mirziyoyev yanvar oxirlarida Birlashgan Arab Amirliklariga qilgan safari chog‘ida «Manchester Siti» klubi egalari sanalmish Abu Dabi valiahd shahzodasi Shayx Xolid ibn Muhammad Ol Nahayon bilan uchrashgan edi. O‘shanda O‘zbekiston prezidenti Abu Dabi valiahd shahzodasi Shayx Xolid ibn Muhammad Ol Nahayon bilan uchrashuvda Abduqodir Husanovning «Manchester Siti» klubiga o‘tishi haqida ham suhbatlashgani ma’lum bo‘lgandi.

#Manchester Siti #Abduqodir Husanov