Venesuelaga AQShdan deportatsiya qilingan migrantlarning birinchi guruhi yetib keldi

Venesuelaga AQShdan deportatsiya qilingan 199 nafar migrantni olib kelgan birinchi samolyot qo‘ndi, deb xabar beradi Euronews.

Qayd etilishicha, dushanba kuni ertalab samolyot Karakas shimolidagi asosiy xalqaro aeroport – Mayketiyaga yetib kelgan. AQSh va Venesuela o‘rtasida diplomatik aloqalar mavjud emasligi sababli, migrantlarni olib ketgan samolyot dastlab Texasdagi harbiy bazadan havoga ko‘tarilgan va Gondurasga qo‘ngan, u yerdan esa migrantlar boshqa samolyot orqali Venesuelaga jo‘natilgan.

«Ushbu insonlarning Qo‘shma Shtatlarda qolishi uchun qonuniy asosi yo‘q. Kelajakda Venesuelaga deportatsiya reyslari doimiy ravishda amalga oshirilishini kutyapmiz. Noqonuniy immigratsiyaga qarshi kurashda hamkorlik qilgani uchun Gonduras prezidenti Kastro hamda uning hukumatiga minnatdorlik bildiramiz», — deyiladi AQSh bayonotida.

O‘tgan hafta Venesuela prezidenti Nikolas Maduro va AQSh prezidenti Donald Tramp migrantlarni deportatsiya qilish to‘g‘risida kelishuvga erishgan edi. Venesuelaga repatriatsiya fevral oyida to‘xtatilgandi, bunga Oq uy rahbari Chevron kompaniyasini Janubiy Amerika davlatida faoliyat yuritish litsenziyasidan mahrum qilgani sabab bo‘lgan.

Reyslarni tiklash bo‘yicha qaror Vashington 238 nafar venesuelalikni Salvadordagi CECOT mega qamoqxonasiga jo‘natganidan keyin qabul qilingan. AQSh hukumati ularni «Tren-de-Aragua» jinoiy guruhiga aloqadorlikda ayblagan. Shu bilan birga, deportatsiya qilingan fuqarolarning qarindoshlariga ko‘ra, aslida bunday emas, Vashington bo‘lsa, dalillarni e’lon qilmagan.

«Migratsiya — jinoyat emas va biz bunga muhtoj bo‘lganlarning barchasi qaytarilmaguncha hamda Salvadorga o‘g‘irlab ketilgan birodarlarimizni qutqarmaguncha tinchimaymiz», — deydi Venesuela Milliy assambleyasi raisi Xorxe Rodriges Gomes.

O‘tgan hafta Nikolas Maduro o‘z hukumatiga AQShda qo‘lga olingan venesuelalik migrantlar repatriatsiyasi uchun zarur bo‘ladigan reyslar sonini oshirishni buyurgandi.