Suriyada internet butunlay uzilib qoldi

«Olingan tezkor ma’lumotlarga ko‘ra, Suriya bo‘ylab umummilliy internet o‘chishi qayd etildi», — deyiladi bayonotda. Xizmatga ko‘ra, bundan avval Suriyaning bir nechta shahrida telekommunikatsiya tizimlarida uzilishlar qayd etilgan, ammo ularning aniq qaysi shaharlar ekani ochiqlanmagan.

Bundan avval, yanvar oyida ham NetBlocks Suriyada bir necha soatlik internet uzilishlarini qayd etgandi. O‘shanda mamlakatning Aloqa vazirligi bu holatni «Bashar Asad rejimi qoldiqlari tomonidan sodir etilgan sabotaj» bilan izohlagan. Bu galgi internet o‘chishiga Suriya hukumati hali rasmiy izoh bermadi.

Eslatib o‘tamiz, Suriyaning sobiq prezidenti Bashar Asad 2024 yil dekabri boshida qurolli muxolifat Damashqni egallaganidan so‘ng mamlakatni tark etgan edi.

2025 yil mart oyida Lataqiya, Tartus, Hama va Hums viloyatida Asad tarafdorlari bo‘lgan alaviylar bilan yangi hokimiyat o‘rtasida qurolli to‘qnashuvlar boshlangan. Janglar oqibatida 1,3 mingdan ortiq kishi halok bo‘lgan, shularning 1 mingdan ziyodi — tinch aholi vakillari. 10 mart kuni xavfsizlik kuchlarining reydlari yakunlangan.

Suriya Mudofaa vazirligi vakili Hasan Abdulg‘aniyning so‘zlariga ko‘ra, «hukumat xavfsizlik kuchlari Bashar Asad rejimi qoldiqlarini neytrallashtirishga va vaziyatni barqarorlashtirishga muvaffaq bo‘lgan».

Shundan so‘ng yangi Suriya hukumati Rossiyaga murojaat qilib, panoh topgan Asadni ekstraditsiya qilishni talab qildi. Al Arabiya va Al Hadath manbalarining ma’lum qilishicha, respublika vaqtinchalik prezidenti Ahmad ash-Shar’a Asad ustidan sud o‘tkazish maqsadida uning qaytarilishini talab qilmoqda. Ammo Rossiya hozircha ushbu talabni qondirishdan bosh tortmoqda. Rasmiy Moskva bu masala «ikki davlat o‘rtasidagi munosabatlarni tiklashga to‘sqinlik qiluvchi murakkab muammo emas», deb hisoblamoqda.