Toshkent viloyatining ba’zi hududlarida qor ko‘chish xavfi e’lon qilindi

26-28 mart kunlari kutilayotgan havo haroratining o‘zgarishi sababli Toshkent viloyatidagi tog‘li hududlarda qor ko‘chish xavfi e’lon qilindi.

Foto: Kun.uz

«O‘zgidromet» 26-28 mart kunlari Toshkent viloyatining ayrim tumanlarida qor ko‘chishi xavfini e’lon qildi.

Xususan, kutilayotgan yog‘ingarchilik hamda havo haroratining o‘zgarishi sababli viloyatdagi ushbu tumanlarning tog‘li hududlarida dengiz sathidan 2000 metr balandlikda qor ko‘chishi mumkin:

Bo‘stonliq;
Ohangaron;
Parkent (Chotqol tizmasining tog‘lari).

Tog‘li hududlarda istiqomat qiluvchi fuqarolar, dam oluvchilar hamda tog‘li hududlarda harakatlanuvchi haydovchilardan ehtiyotkorlik choralarini ko‘rish so‘raladi.

Joriy hafta davomida O‘zbekistonda beqaror ob-havo saqlanib turadi. Hududlarda yomg‘ir yog‘adi, ba’zi joylarda kuchli bo‘ladi. Harorat kechalari +4, kunduz kunlari +8 darajagacha pasayadi.