Daniya tarixda ilk bor ayollarni harbiy xizmatga chaqirish boshlanadi

Daniyada 2025 yil 1 iyuldan boshlab nafaqat erkaklar, balki ayollar ham harbiy xizmatga chaqiriladi. Ushbu amaliyot rejadagidan ikki yil oldin boshlanmoqda, deydi mamlakat mudofaa vaziri Troels Lund Poulsen.

Uning so‘zlariga ko‘ra, Kopengagen «mudofaa siyosati va xavfsizlik sohasidagi hozirgi vaziyat» tufayli shu kabi qadamni tashlashga majbur bo‘lmoqda.

Ayollarni xizmatga chaqirish harbiy xizmat muddatini to‘rt oydan 11 oyga qadar oshirishni nazarda tutuvchi islohotlarning bir qismi hisoblanadi. Erkaklar singari, agar yetarli miqdorda ko‘ngillilar to‘planmasa, ayollarning harbiy xizmatga chaqirilishi ham yillik qur’a tashlash orqali hal qilinadi.

Daniyada ayollarni xizmatga chaqirish 2027 yildan boshlanishi kutilgan edi. Ammo mamlakat hukumati joriy yildan armiyada «erkaklar va ayollar o‘rtasida to‘liq tenglikni ta’minlash» uchun islohotlarni tezlashtirishga qaror qilgan.

Shu bilan birga, Daniya o‘zining mudofaa xarajatlarini ham oshiradi. Fevral oyida bosh vazir Mette Frederiksen 2025 yilda mamlakat armiya ehtiyojlari uchun qo‘shimcha 6,8 milliard yevro sarflashini ma’lum qilgandi. U «Rossiyaning tajovuzkor siyosatini» mamlakat uchun asosiy tahdid deb atagan.