NYT: Rossiya generallari 2022 yilda Ukrainaga yadroviy zarba bermoqchi bo‘lgan

Rossiya armiyasi qo‘mondonligi 2022 yil kuzda — qo‘shinlar avvaliga Xarkiv oblastini, keyin esa Xersonni qo‘ldan bor bergach, Ukrainaga taktik yadroviy zarba berish imkoniyatini ko‘rib chiqqan. Bu haqda The New York Times rossiyalik generallarning maxfiy suhbatlarni qo‘lga kiritgan AQSh razvedkasi ma’lumotlariga tayanib xabar berdi.

NYT’ning yozishicha, yadroviy quroldan foydalanish haqida o‘sha vaqtda Rossiyaning Ukrainadagi qo‘shinlari qo‘mondoni, keyinroq esa «Vagner» XHK isyoniga aloqadorligi bois hibsga olingan general Sergey Surovikin gapirgan. Razvedka ma’lumotlariga ko‘ra, Surovikin Ukraina qo‘shinlari Dneprni kesib o‘tishiga va Qrimga ehtimoliy hujum boshlashiga to‘sqinlik qilish maqsadida yadroviy zarbani ko‘rib chiqqan.

AQSh razvedkasi suhbatlarni qo‘lga kiritganidan so‘ng Ukraina mojarosida yadroviy eskalatsiya ehtimolini keskin oshirgan. Agar Rossiyaning janubiy fronti yemirila boshlasa, bu ehtimol 5-10 foizdan 50 foizgacha oshishi mumkin, deb baholangan.

Financial Times ma’lumotlariga ko‘ra, AQSh yadroviy eskalatsiyaning oldini olishga Xitoyni jalb qilgan. XXR raisi Si Tszinpinning shaxsan o‘zi yadroviy quroldan foydalanish Moskva va Pekin munosabatlariga zarar yetkazishi haqida Putinni ogohlantirgan.

Polsha TIV rahbari Radoslav Sikorskiy o‘tgan yilning mayida AQShning o‘zi ham Kremlga bu borada signal berganini ma’lum qilgandi. «Amerikaliklar ruslarga agar yadroviy bombadan foydalansangiz, hatto hech kim halok bo‘lmagan taqdirda ham, biz Ukrainadagi obektlaringizni oddiy qurol bilan yakson qilamiz dedi», — degan edi Sikorskiy.