Yaponiyadagi sun’iy orollarda joylashgan aeroport dengiz ostiga g‘arq bo‘lishi mumkin

Osaka ko‘rfazidagi ikkita sun’iy orolda joylashgan Kansay xalqaro aeroporti haddan ortiq og‘ir infratuzilma tufayli cho‘kib ketishi mumkin, deb yozadi Bild.

Aeroport 20 milliard dollar evaziga qurilgan va 1994 yilda ochilgan. Ayni vaqtda u yiliga 30 milliondan ziyod yo‘lovchiga xizmat ko‘rsatadi. Aeroport Yaponiyaning materik qismi bilan 3,75 kilometrli ko‘prik orqali bog‘langan.

Qayd etilishicha, aeroport konstruksiyasi hatto kuchli zilzilaga ham bardosh bera oladi: uchish-qo‘nish yo‘lagiga maxsus asfalt-beton aralashma quyilgan bo‘lib, u yemirilish va deformatsiyaga bardoshli.

Ushbu havo bandargohining asosiy muammosi — aeroport og‘irligi loy va balchiqdan iborat dengiz tubiga bosim o‘tkazayotganida. Aeroport faoliyatining dastlabki yillarida muhandislar u 50 yil davomida 8 metrga cho‘kishini taxmin qilgan, ammo Kansay aeroporti foydalanishga topshirilgan vaqtdayoq mazkur ko‘rsatkichdan o‘tib ketilgan.

Bugungi kunda havo bandargohi 11,5 metrgacha cho‘kkan, 2056 yilga borib konstruksiya butunlay suv ostiga g‘arq bo‘lishi mumkin.

Kansay aeroporti dunyodagi eng uzun terminal binosiga ega — 1,7 kilometr. Shuningdek, u bagajlarni qayta ishlash bo‘yicha o‘ziga xos ko‘rsatkichni qayd etgan: bu yerda shu vaqtgacha birorta ham bagaj yo‘qolmagan.