Xorvatiyada og‘ir tan jarohati olgan o‘zbekistonlik vatanga qaytarildi

Elchixona xodimlari Xorvatiyada og‘ir tan jarohati olgan fuqaroning O‘zbekistonga qaytishiga amaliy yordam ko‘rsatdi, deb xabar beradi Dunyo agentligi.

Elchixona ma’lumotiga ko‘ra, fuqaro N.S. 2024 yilda ishlash uchun Zagreb shahriga borgan. O‘tgan yil 29 noyabr kuni u yo‘l-transport hodisasi oqibatida og‘ir tan jarohati olgan va Zagreb shahridagi markaziy shifoxonaga yotqizilgan. Bemor o‘tgan vaqt davomida doimiy tarzda shifokorlar nazoratida bo‘lgan.

Qayd etilishicha, diplomatik missiya shifokorlar va shifoxona vakillari bilan O‘zbekiston fuqarosining ahvoli yuzasidan muloqot qilib turgan. Jabrlanuvchining oila a’zolari bilan ham muloqot o‘rnatilgan va bemorning ahvoli to‘g‘risida aniq ma’lumotlar taqdim etilgan.

Bemorning murakkab ahvoli inobatga olinib, diplomatik vakolatxona tashabbusi bilan Migratsiya agentligi va O‘zbekiston Sog‘liqni saqlash vazirligi ko‘magida yuqori malakali tibbiyot mutaxassisi Xorvatiyaga olib kelingan.

Barcha jalb qilingan tuzilmalarning muvofiqlashtirilgan sa’y-harakatlari tufayli N.S. 11 aprel kuni O‘zbekistonga muvaffaqiyatli yetkazilgan. Vatanga yetib kelgach, u ixtisoslashtirilgan tibbiyot muassasasiga joylashtirilgan va kerakli davolanishni davom ettirmoqda.

Avvalroq Myanmada odam savdosi qurboni bo‘lgan ikki o‘zbekistonlik vatanga qaytarilgani, Rossiyaning Novosibirsk viloyatida og‘ir hayotiy vaziyatga tushib qolgan voyaga yetmagan bola va uning ota-onasi O‘zbekiston Bosh konsulxonasi ko‘magida O‘zbekistonga kuzatib qo‘yilgani to‘g‘risida xabar berilgandi.